“Казан”
милли мәдәният үзәгендә Бөтендөнья
татар конгрессы Башкарма комитеты
Татарстан Республикасының Фән һәм
мәгариф министрлыгы белән берлектә БДБ
һәм Балтия илләре, Русия Федерациясе
регионнарынан килеп Татарстан югары
уку йортларында белем алучы студентларның
еллык җыенын уздырды. Быел ул бишенче
кат үтте. Аның максаты - халкыбызның
милли-мәдәни кыйммәтләрен, гореф-гадәтләрен
өйрәнү һәм үзләштерү, студентларны
Бөтендөнья татар конгрессы Башкарма
комитеты һәм уку йортларының җәмгыяви
эшчәнлегенә тарту, аларның Казандагы
студент тормышына җайлашуы турында
фикер алышу.
Студентлар
белән очрашуга мәртәбәле кунаклар күп
килгән иде. Алар арасында Бөтендөнья
татар конгрессы Башкарма комитеты
рәисе, Татарстан Дәүләт Советы депутаты
Ринат Закиров, Мәгариф һәм фән министры
урынбасары Данил Мостафин, Татарстан
Республикасының Фәннәр Академиясе
вице-президенты, Дәүләт Советы депутаты
Азат Зиятдинов, Татарстан Республикасының
Фәннәр Академиясе фәнни сәркатибе Дания
Заһидуллина, ТР Президенты Аппаратының
тышкы эшләр департаментының сектор
җитәкчесе Азат Ахтареев, Татарстан
Республикасының Фәннәр Академиясе
академигы, тарих фәннәре докторы, КДУ
профессоры Миркасыйм Госманов, КДУ
проректоры Рияз Минзарипов, КДУның
татар филологиясе һәм тарихы факультеты
деканы, тарих фәннәре докторы, КДУ
профессоры Искандәр Гыйләҗев, КДУ
профессоры, университетның татар теле
кафедрасы җитәкчесе Хатыйп Миннегулов,
ТДГПУ институтының директор урынбасары
Альберт Борханов, КХТИ проректоры Илнур
Абдуллин, “Җыен” фонды директоры Фуат
Рафиков, Г.Камал исемендәге ТДАТ директоры
Шамил Закиров, Татарстанның һәм Россиянең
халык артисткасы Нәҗибә Ихсанова һәм
башкалар бар иде. Әлеге очрашу дәүләт,
җәмәгать эшлеклеләренең, галимнәрнең,
студентларның чыгышлары һәм халкыбызның
яраткан җырчылары Алсу Әбелханова,
Рөстәм Закиров, Гүзәл Җәләлова, Айдар
Габдинов, Лилиана Газизоваларның моңлы,
матур җырлары белән бергә үрелеп барды.
Татарстан
Республикасы Конституциясе нигезендә
2003 нче елдан бирле Республикабыз югары
уку йортлары читтә яшәүче милләттәшләребезне
укырга кабул итәләр. Соңгы ике елда
әлеге эш тәгаенләнгән программа
кысаларында алып барыла. Аны Татарстанның
14 югары уку йорты, Президентының тышкы
эшләр Департаменты, Бөтендөнья татар
конгрессы Башкарма комитеты, Мәгариф
һәм фән министрлыгы, ректорлар Советы
бергәләп алып бара.
7 ел дәверендә
республика уку йортларына Башкортостан,
Удмуртия, Марий Эл, Чуашия, Карачай-Черкеск
республикаларыннан, һәм шулай ук Омск,
Төмән, Курган, Свердлау, Ульян, Пермь,
Киров, Самара, Саратов, Әстерхан, Ырынбур
өлкәләреннән һәм чит илләрнең Азәрбайҗан,
Казахстан, Кыргызстан, Үзбәкстан,
Таҗикстан, Беларусь, Украина, Литва,
Латвия, Кытай кебек илләреннән 900гә якын
студент кабул ителгән.
2009 елда
Татарстан уку йортларына чит илләрдән
97, Русия Федерациясе регионнарыннан 73
студент, шулай ук Кытайның Синзянь-Уйгур
автоном районыннан 29 укучы Казан дәүләт
университетының әзерлек курсларына
кабул ителде.
Мондый
ихластан уздырылган чаралар эчтәлеге
белән дә, танылган шәхесләрнең
хәер-фатыйхалы чыгышлары белән дә яшь
буын вәкилләрендә озак сакланыр.
|